Inisiativanan Sosial Pasado di Sklabitut Transatlántiko pa e parti Karibense di Reino
Riba 19 di desèmber 2022, e Promé Minister hulandes na nòmber di su gobièrnu a ofresé diskulpa pa e aktuashon hulandes den pasado en relashon ku e pasado di sklabitut. E diskulpanan a bini despues di un lucha pa añanan dor di aktivistanan for di Reino i for di Sürnam.
Pareu ku e diskulpa, tambe a publiká un reakshon di e gabinete riba e informe di investigashon ‘Kadenanan di Pasado’ di e grupo di diálogo Pasado di Sklabitut, presentá na yüli 2021. Den su informe, e grupo di diálogo a konsehá pa entre otro tuma e siguiente akshonnan::
- Oumentá konsientisashon tokante e sklabitut transatlántiko via investigashon, edukashon i proyekto artístiko.
- Fortalesé konosementu tokante nifikashon di diskriminashon den bida diario.
- Hasi e pasado di sklabitut visibel di moda ku esaki por bira un historia kompartí.
Den e kuadro aki, entre otro a disidí pa habri e areglo di supsidio Inisiativanan Sosial Pasado di Sklabitut Transatlántiko pa e parti Karibense di Reino (SUMS-C). A publiká esaki riba promé di yüli 2025, i e ta hasi un presupuesto di €29.333.333 disponibel. Ta posibel pa – repartí den ocho periodo di solisitut – pidi supsidio pa proyektonan dirigí riba konosementu i konsientisashon, rekonosementu i konmemorashon, i riba un mihó komprondementu di e impakto di e pasado di sklabitut i prosesamentu di esei.
Riba 11 di ougùstùs 2025, 9 or di mainta, lo habri e promé periodo di solisitut pa pidi supsidio den kuadro di profeshonalisashon di e organisashon ku ta hasi e solisitut (kategoria 1). Lo habri un siguiente periodo pa entrega di solisitut pa proyektonan di entre $10.000 i $25.000 (kategoria 2) riba promé di desèmber 2025.
Por entregá un solisitut di supsidio via e Portal di supsidio di Uitvoering Van Beleid (Ehekushon di Maneho). Lesa mas tokante e areglo di supsidio aki.
Pa mas informashon tokante e areglo aki i apertura di e otro periodonan di solisitut, tene e wèpsait aki na bista.
Tambe a publiká un areglo di supsidio Inisiativanan Sosial Transatlántiko Pasado di Sklabitut pa Hulanda Oropeo (SUMS-NL). Mas informashon tokante e areglo di supsidio aki bo por haña riba e wèpsait aki.