Bista general kriterionan di solisitut

Petishonario di supsidio
Personanan hurídiko sin fin di lukro establesé den e parti karibense di e Reino por hasi un solisitut. E inisiativanan sosial mester tuma lugá den e parti karibense di e Reino.

Personanan natural no ta bini na remarke pa e supsidio.

Pa personanan hurídiko sin fin di lukro na Hulanda Oropeo tin un areglo di supsidio pa Hulanda Oropeo.

Aktividatnan ku por supsidiá
E supsidio ta hasi disponibel kuater kategoria ku por pidi supsidio p’e. Bou di e  kategorianan aki tin vários posibel aktividat ku ta bini na remarke pa supsidio.

Kategoria 1 – profeshonalisashon: estudio, kurso òf entrenamentu dirigí riba oumento di konosementu i e abilidat pa ehersé tarea atministrativo òf organisashon òf mehorashon di e organisashon atministrativo di e petishonario. Ademas, konstrukshon òf mehorashon di e wèpsait di e petishonario, ku tin komo meta pa pidi atenshon pa aktividatnan ku ta kuadra ku e metanan di areglo aki, por supsidiá bou di e kategoria aki. E kondishon ta ku e petishonario ku a pidi e supsidio aki ta traha pa e metanan di e areglo di supsidio. Mester por demostrá esaki for di e statutonan di bo organisashon òf di un otro manera.

Kategoria 2 – inisiativanan sosial di eskala chikí: diferente proyekto relashoná ku e pasado di sklabitut, organisashon di enkuentro òf evento ku ta kontribuí na prosesamentu di e pasado di sklabitut, proyekto edukativo i ekspreshon artístiko inkluso ekshibishon i presentashon. E kondishon pa e kategoria aki i pa kategorianan siguiente ta ku e proyektonan ta na benefisio di desendiente di hende sklabisá (komunidat) i ta dirigí riba e metanan di e areglo di supsidio.

Kategoria 3 – inisiativanan sosial di eskala mediano: diferente proyekto relashoná ku e pasado di sklabitut, organisashon di enkuentro òf evento ku ta kontribuí na prosesamentu di e pasado di sklabitut, proyekto edukativo i ekspreshon artístiko inkluso ekshibishon i presentashon.

Kategoria 4 – inisiativanan sosial di eskala grandi: diferente proyekto relashoná ku e pasado di sklabitut, organisashon di enkuentro òf evento ku ta kontribuí na prosesamentu di e pasado di sklabitut, proyekto edukativo i ekspreshon artístiko inkluso ekshibishon i presentashon. Solamente proyektonan ku un impakto permanente òf di durashon largu òf ku un alkanse grandi ku ta hasi e pasado di sklabitut i e historia kompartí visibel ta bini na remarke pa e kategoria aki.

Paga tinu: e reprodukshon aki ta un resúmen di e aktividatnan posibel. Konsulta artíkulo 7 di e areglo pa un bista general kompleto.

Informashon nesesario huntu ku e solisitut
Entrega di un solisitut di supsidio ta tuma lugá pa medio di un formulario di solisitut elektróniko firmá pa un funshonario, outorisá pa aktua na nòmber di e petishonario di supsidio. Parti di e solisitut ta en todo kaso:

- HetUn formulario di solisitut yená por kompleto;

- Un prueba ku e number di kuenta di banko ta riba nòmber di e organisashon ku ta pidi supsidio;

- Si ta aplikabel, un outorisashon;
Si abo komo miembro di direktiva no ta outorisá independientemente òf ora un otro persona, por ehèmpel un konsehero di supsidio ta entregá e solisitut na nòmber di bo, un outorisashon ta obligatorio.

I ta bini aserka pa kategoria 2, 3 i 4:

- Un plan di aktividat

- Un presupuesto

Ora bo pidi supsidio pa profeshonalisashon di personanan hurídiko ku ta traha den e parti karibense di e Reino i ta traha na benefisio di e metanan menshoná den e areglo (kategoria 1), lo pidi bo pa duna informashon tokante e kontenido i gastunan di bo proyekto for di dén e formulario di solisitut.

Un solisitut ta kompleto ora e formulario elektróniko i e aneksonan obligatorio ta yená kompletamente, i e Minister a risibí nan den e periodo di solisitut. Ta posibel pa e petishonario kaba kompletá petishonnan di supsidio inkompleto denter di 2 siman despues di e notifikashon di e Minister ku e solisitut ta inkompleto. Petishonnan ku a kompletá lo pone patras den e órden di trato.