Tokante e areglo di supsidio Inisiativanan Sosial Pasado di Sklabitut Transatlántiko pa e parti Karibense di Reino

Pa e areglo intenshoná pa e parti karibense di Reino, tin un presupuesto di €29.333.333.

E intenshon di e supsidio ta pa ofresé organisashonnan ku tin di aber ku e tópiko pasado di sklabitut, e posibilidat pa nan sigui desaroyá nan mes.  Ademas, e  supsidio ta ofresé e posibilidat pa, pa medio di proyektonan, kontribuí na konsientisashon i promové un mihó komprondementu di e impakto di e pasado di sklabitut.

Metanan
Loke ku ta bin na remarke pa supsidio ta aktividatnan i inisiativanan sosial ku ta duna un kontribushon supstansial na por lo ménos un di e metanan menshoná den e reakshon di gabinete di 19 di desèmber 2022:

• adkirí un mihó komprondementu di e impakto di e pasado di sklabitut i kontrarestá e konsekuensianan di e impakto di e pasado di sklabitut den presente;
• prosesá impakto di e pasado di sklabitut;
• promové konosementu i konsientisashon tokante e pasado di sklabitut; òf
• rekonosé i konmemorá e pasado di sklabitut.

Solisitantenan di supsidio
Personanan hurídiko ku no tin meta pa hasi ganashi (p.e. fundashon i asosashon) establesé riba un di e islanan di e parti karibense di Reino por hasi un petishon pa subsidio. E aktividatnan i inisiativanan sosial mester tuma lugá na un òf mas di e islanan den e parti karibense di Reino.

Personanan natural no ta bini na remarke pa e supsidio.

Personanan hurídiko ku no tin meta pa hasi ganashi (p.e. fundashon i asosashon) establesé na Hulanda Oropeo tampoko no ta bini na remarke pa e areglo di supsidio aki. Nan por entregá un petishon pa e areglo di supsidio Inisiativanan Sosial Transatlántiko Pasado di Sklabitut pa Hulanda Oropeo.

Kategorianan di supsidio

E areglo tin kuater kategoria disponibel pa kua por pidi supsidio:

Kategoria 1: Profeshonalisashon di organisashonnan  ku ta traha den e parti karibense di Reino, ku un durashon máksimo di 1 aña i ku ta traha na benefisio di e metanan menshoná den e areglo. Den e kategoria aki, organisashonnan ku hasi un petishon lo hanja un supsidio di USD 10.000,-. 

Kategoria 2: Inisiativanan sosial chikí na e parti karibense di Reino ku un durashon máksimo di 1 aña i ku ta kontribuí na e metanan menshoná den e areglo. Den e kategoria aki, organisashonnan por pidi un supsidio mínimo di USD 10.000 te un máksimo di USD 25.000,-

Kategoria 3: Inisiativanan sosial mediano den e parti karibense di Reino ku un durashon máksimo di 4 aña i ku ta kontribuí na e metanan menshoná den e areglo. Den e kategoria aki, organisashonnan por pidi un supsidio mínimo di USD 25.000,- te un máksimo di USD 125.000,-.

Kategoria 4: Inisiativanan sosial grandi den e parti karibense di Reino, ku un durashon máksimo di 4 aña i ku ta kontribuí na e metanan menshoná den e areglo. Den e kategoria aki, organisashonnan por pidi un supsidio mínimo di USD 125.000,- te un máksimo di USD 500.000,-.

Aktividatnan ku por wordu supsidiá
Bou di e kuater kategorianan disponibel tin vários aktividat ku por haña subsidio pe.

Kategoria 1 – profeshonalisashon: estudio, kurso òf entrenamentu dirigí riba oumento di konosementu i abilidat pa hasi tarea atministrativo òf organisashon òf mehorashon di e organisashon atministrativo di  esun ku ta hasi e petishon. Ademas, konstrukshon òf mehorashon di e wèpsait di esun ku ta hasi e petishon, ku tin komo meta pa pidi atenshon pa aktividatnan ku ta kuadra ku e metanan di areglo aki, por keda supsidiá bou di e kategoria aki. E kondishon ta ku esun ku ta hasi e petishon ta traha pa e metanan di e areglo di supsidio. Mester por demostrá esaki a base di e statutonan di bo organisashon òf di un otro manera.

Kategoria 2 – inisiativanan sosial chikí: diferente proyekto relashoná ku e pasado di sklabitut, organisashon di enkuentro òf evento ku ta kontribuí na prosesamentu di e pasado di sklabitut, proyekto edukativo i ekspreshon artístiko inkluso ekshibishon i presentashon. E kondishon pa e kategoria aki i pa kategorianan siguiente ta ku e proyektonan ta na benefisio di desendiente di hende sklabisá (komunidat) i ta dirigí riba e metanan di e areglo di supsidio.

Kategoria 3 – inisiativanan sosial mediano: diferente proyekto relashoná ku e pasado di sklabitut, organisashon di enkuentro òf evento ku ta kontribuí na prosesamentu di e pasado di sklabitut, proyekto edukativo i ekspreshon artístiko inkluso ekshibishon i presentashon.

Kategoria 4 – inisiativanan sosial grandi: diferente proyektonan relashoná ku e pasado di sklabitut, organisashon di enkuentro òf evento ku ta kontribuí na prosesamentu di e pasado di sklabitut, proyekto edukativo i ekspreshon artístiko inkluso ekshibishon i presentashon. Solamente proyektonan ku un impakto permanente òf di durashon largu òf ku un alkanse grandi ku ta hasi e pasado di sklabitut i e historia kompartí visibel ta bini na remarke pa e kategoria aki.

Paga tinu: e reprodukshon aki ta un resúmen di e aktividatnan. Konsultá artíkulo 7 di e areglo pa un bista general kompleto.
 

Periodonan
Pa kada kategoria tin dos periodo di solisitut. Bo por hasi un petishon pa supsidio solamente den e periodonan aki.

Paga tinu: e bista general akiriba ta ku reserva, e periodonan di solisitut por kambia dor di sirkunstansia. Konsulta e areglo di supsidio pa e bista general di mas aktualisá.