Areglo temporal di benefisio sosial pa desempleo BES

Na Hulanda Karibense aktualmente no ta eksistí un benefisio sosial pa desempleo pa empleado ku ta pèrdè trabou. Maske algun hende por hasi uso di ònderstant, esaki no ta konta pa tur hende komo ku ta wak entrada i aktivo. P’esei, hende ku a pèrdè trabou mes mester mira pa yega fin di luna finansieramente durante un periodo di desempleo. For di den sosiedat i den gobièrnu, pa e motibu aki a surgi atenshon pa introdukshon di un areglo pa empleado desempleá. E Areglo temporal di benefisio sosial pa desempleo BES ta intenshoná pa empleadonan desempleá na Boneiru, Sint Eustatius i Saba ku:

• ta traha na Boneiru, Sint Eustatius òf Saba;
• ta risibí un suèldu for di un dunadó di trabou;
• ta bira desempleá sin ku nan mes tin falta.

E areglo ta drenta na vigor riba promé di yanüari 2027 i ta konta te ku 31 di desèmber 2031, pa mas tardá. Pues ta posibel pa, for di promé di yanüari 2027 entregá un aplikashon pa bini na remarke pa e benefisio sosial pa desempleo. Bo por risibí un benefisio sosial pa maksimalmente 3 luna.

Implementashon di e Areglo temporal di benefisio sosial pa desempleo BES ta tuma lugá den kolaborashon ku e unidat Asuntunan Sosial i Empleo di RCN (Unidat SZW di RCN) i Uitvoering Van Beleid di e Ministerio di Asuntunan Sosial i Empleo.

Ròl di e unidat SZW di RCN

E Unidat SZW di RCN ta e promé punto di kontakto pa habitantenan di Boneiru, Sint Eustatius i Saba.

Aki bo por akudí pa:

• Informashon i pregunta;
• Entrega di bo aplikashon;
• Sosten durante e proseso.

Dor di e presensia lokal, e servisio ta sigui aksesibel i adekuá pa e situashon na e islanan.

Ròl di Implementashon di Maneho (Uitvoering Van Beleid)

Implementashon di Maneho ta pèrkurá pa e elaborashon atministrativo di e areglo.

Bou di esaki ta kai:

• evaluashon di aplikashon;
• toma di desishon;
• ehekushon di pago;
• kontròl riba implementashon di e areglo.

Aki bo ta haña e regulashon ofisial tokante e Areglo temporal di benefisio sosial pa desempleo BES.