Meta di e areglo
Na Hulanda Karibense aktualmente no ta eksistí un benefisio sosial pa desempleo pa empleado ku ta pèrdè trabou. Maske algun hende por hasi uso di ònderstant, esaki no ta konta pa tur hende komo ku ta wak entrada i aktivo. P’esei, hende ku a pèrdè trabou mes mester mira pa yega fin di luna finansieramente durante un periodo di desempleo. For di den sosiedat i den gobièrnu, pa e motibu aki a surgi atenshon pa introdukshon di un areglo pa empleado desempleá. E Areglo temporal di benefisio sosial pa desempleo BES ta intenshoná pa empleadonan desempleá na Boneiru, Sint Eustatius i Saba ku:
- ta traha na Boneiru, Sint Eustatius òf Saba;
- ta risibí un suèldu for di un dunadó di trabou;
- ta bira desempleá sin ku nan mes tin falta.
E areglo ta drenta na vigor riba promé di yanüari 2027 i ta konta te ku 31 di desèmber 2031, pa mas tardá. Pues ta posibel pa, for di promé di yanüari 2027 entregá un aplikashon pa bini na remarke pa e benefisio sosial pa desempleo. Bo por risibí un benefisio sosial pa maksimalmente 3 luna.
E benefisio sosial ta kuminsá:
- riba e promé dia di e luna si bo empleo ta terminá entre e promé i e di 14 dia di luna;
- riba e di 15 dia di luna si bo empleo ta terminá entre e di 15 dia i fin di luna.
E fecha final di e benefisio sosial ta fihá kaba for di e momentu ku aprobá bo aplikashon. E fecha aki no ta kambia. E fecha final di bo benefisio sosial lo determiná asina ku a aprobá bo aplikashon. Mientrastantu ku nada kambia den bo situashon i bo ta kumpli ku e reglanan, e fecha final ei ta sigui meskos.
Ehèmpel:
Bo benefisio sosial ta kuminsá riba promé di yanüari? E ora ei e benefisio sosial ta para riba promé di aprel.
Ki ora bo ta bini na remarke?
Den e 10 lunanan promé ku bo pèrdè trabou, bo mester a traha minimalmente 26 siman, di kua minimalmente 1 ora pa siman.
E siguiente simannan tambe ta konta:
- simannan ku ferlòf pagá;
- simannan ku bo tabata malu i tabata risibí suèldu òf un benefisio sosial pa enfermedat;
- simannan ku ferlòf di kuido òf ferlòf di kalamidat.